نواصر بالدجاج - Nwasser au poulet [بالدارجة التونسيّة]

باش نستحقو للنواصر لزوز عباد: 

300غ نواصر 

زوز طروف دجاج

4مغارف زيت زيتونة+ نص فنجان لعجينة النواصر

زوز ريوس بصل متوسطين

زوز مغارف طماطم معجونة

كعبة طماطم

3سنين ثوم

زوز عود قرنفل ملح، فلفل اكحل، كركم

معرفة صغيرة بسباس

فلفل زينة

كعبتين بطاطا صغار

150غ حمص 

زوز قرون فلفل

 نبداو توا نطيبو، أول حاجة نحطو الزيت في الطنجرة. نقصو البصل و نرميوه يتقلا، نحوطو الطماطم المعجونة و نحركو، تتقلا شوية نقوصو كعبة الطماطم على 4 و نرميوها. نزيدو الثوم و توا نحطو طروف الدجاج بعد ما نحيو الجلدة متاعهم. نخليوهم يتقلاو شوية.

 نبداو نفوحو: ملح، فلفل اكحل، كركم و بسباسو عود قرنفل.

بعد ما يتقالاو مليح مليح نصوبو زوز كيسان ماء ونحطو الفلفل الأحمر حسب الذوق.

نمشيو توا نحضرو النواصر إلّي باش نفورها، ناخذو ال300غ نواصر نبسوها بالزيت زيتونة و بعد نحوطوها في الكسكاس أول ما 

المرق يهزّ الغليات و مذابينا نخليو 3دقايق و بعد نغطيوها.

نحطو الحمص يطيب في كسارونة أخرى مع الماء و شويّة خميرة (baking powder).

 

نقشرو البطاطا و نقليوها و بعد نقليو الفلفل. نخليوها الطيب و ديما نتقفدو نيفو الماء باش المرق ما يشيحش. و كل شوية نحركو النواصر.

 

كي تحس النواصر بدأت توالي ترونسبارن نبداو توّا بالمرحلة الجديدة إلّي هي: ناخذو لوش مرق و نسقيو باها النواصر على نار هادئة... و قبل كل مرّة ما نسقيوها نحركوها شوية، نعاودو الفازة 3-4 مرات.... و كان في المرّة الأولى نخليوها مغطية من بعد نسقيوها و نخليوها من غير غطا....

من بعد، نقلبوها في Pyrex باش تتجمّر في الفور... 

نحوطو الدجاج البطاطا، الحمص، الفلفل و نزيدوها لوش مرق.... النواصر تيتاكل سخونة.

 

 

 بالشفاء و الهناء

[بالدارجة التونسيّة] Orange chiffon cake - قاتو البرتقال -

قاتو عالمي بالبرتقال. باش نستحقّو:

6 عضمات كبار,

زوز كيسان و ربع فارينة,

كأس و نص سكّر ارطب (سكّر محوّر),

باكو خميرة,

نفّة ملح,

زوز مغارف زاست الاورونج.

نص كاس زيت عبّاد الشمس,

تلاثة أرباع كاس (180 مل) عصير الارونج,

باكو فانيليا. 

نقسمو الأبيض و الأصفر متع العضم و نغطيوهم و نخليوهم حكاية 30 دقيقة باش يوليو في سخانة البيت.

بعد ما يتعدّاو ال30 دقيقة, نبداو نحطّو الفور يسخن على 170 درجة.

نحضرو المول, ندهنوها بالزبدة و نروشو الفاربنة.

نبداو نحطو الفارينة, الخميرة, كأس سكر (النصّ إلّي قعد للأبيض متع العضم), الملح و الزاست متع البرتقالة. نخلطوهم شوية و بعد نعملو غرقة في الوسط.

نحطّو باكو الفانيليا, أصفر العضم, نص كأس الزيت و العصير و نركضو لمدّة 3 دقائق.

من بعد, نبداو نركضو الابيض متع العضم, كي بدا يشدّ روحو نزيدوه نص كأس سكّر إلّي قعد بالشويّة بالشويّة. كي الخلطة تولّي عاقدة نوقّفو.

توّا نخلطوها مع الخلطة اللولة بالشوية بالشوية. نحاولو نسايسو لو ماكس.

نصبّو الخلطة في المول و نحطّوها في الفور ل 55-60 دقيقة. و بعد ما نقوسوها كان بعد ساعة ولاّ ساعة و نصّ.

بالشفاء...