أكثر حاجة تشافيت

vendredi 10 avril 2015

كسكسي العادة و السنّة بالحمص و الزبيب {لحم علوش} [دارجة تونسيّة]




باش نستحقو كيلو لحم علوش، تلاثة مغارف كبار طماطم، أربعة ريوس بصل كبار ثلاثة باش نقطعوهم و واحد نرشقو فيه 5 أعواد قرنفل، فنجان زيت زيتونة، تلاثة سنون ثوم، 6-7 قرون فلفل باش نقليوهم، 250غ زبيب، 300غ حمص منفّخ و كيلو كسكسي دياري ولاّ باكوات.






نبداو نغليو زوز كيسان ماء في الطنجرة. نحطو نفوحو اللحم في ماجنة مع الطماطم المعجونة و البصل المقصوص. نحطو فلفل اكحل و فلفل أحمر و ملح و الزيت نخلطوهم شوية بيدنا. وقتلّي يغلى الماء نحطو اللحم و اللّي معاه.
نخليوها تشكشك و نمشيو نعملو الكسكسي كانو دياري نغوموه بالماء و بعد نزليلو و كانو باكوات 4 مغارف زيت و نبثبوه بالماء باش يتنفخ شويّة. نمرقو الطنجرة متاعنا ونغطيوها باش تهز الغلية.



دوب ما تغلي الطنجرة نحطو الكسكسي في الكسكاس باش يفوّر. احنا نعملو تفويرة وحدة خاطرو دياري. و زوز تفويرات بالنسبة الكسكسي باكوات. نحطو الحمص يطيب في طنجرة مع شوية خميرة. 






بعد ما يفوّر الكسكسي و يطيب نهبطوه. نستاناو اللحم يكمّل يطيب و في اللخر نحطو الزبيب في الكسكاس يطيب شويّة. 


طاب اللحم، طاب الكسكسي، طاب الحمص، طاب الزبيب، نقليو قرون الفلفل. نسقيو.. و ناكلو بالشفاء.
في سوسة هذا إسمو "كسكسي دار العرس"


Aucun commentaire:

Enregistrer un commentaire